Share

NewsG RianVorsterDie Hoërskool Eldoraigne het nie net vir 'n opskudding met sy laaste poelwedstryd van die Tuks-reeks op Emirates Airline-park teen Monument gesorg nie, maar ook sommer 'n duidelike waarskuwing aan die ander spanne in die reeks gestuur.

Eldoraigne het Monnas met 27-22 in die vernaamste voorwedstryd vir die Emirates Lions en Reds se SuperRugby-kragmeting verslaan. Dit was Eldoraigne se eerste sege oor die span van Krugersdorp sedert hulle in 2007 vir Monnas in die eindstryd van die Michelin-reeks, soos die Tuks-reeks destyds bekend gestaan het, verslaan het.

Eldoraigne het toe ook vir Monnas in hul groepwedstryd verras voordat Eldoraigne destyds in die eindstryd gewys het dat die sege nie 'n vloekskoot was nie. Die titel wat Eldoraigne in die gesogte reeks verower het was ook die laaste keer wat 'n skool sonder 'n koshuis as kampioen gekroon is.

Die groot held vir Eldos in die oorwinning was sonder twyfel sy buitesenter, Riaan Burger. Hy het telkemale gapings in Monnas se verdediging oopgekloof en het self ook twee keer 'n draai agter die doellyn gaan maak. Hy het ook die aanvoorwerk vir die linkervleuel, Marcel Venter, se se drie gedoen.  

'n Feit wat nie uitgelaat kan word om die volle prentjie te skep nie is dat vyf van Monument se spelers - sy beste vyf spelers - die wedstryde weens die SA Skole-oefenkamp in Wellington misgeloop het. Hulle is die skrumskakel Tinus Combrinck, losskakel Luke Rossouw, haker Morne Brandon, flank PJ Jacobs en die slot Cristen van Niekerk. 

Monnas se flank Tristan Dullisear het nooit handdoek ingegooi nie. Hy het deurgans goeie lopies met die bal onder die arm vasgeklem ingekry en ook by die afbreekpunte meer as sy kant gebring. 

Eldoraigne het met die sege 'n afpraak volgende Saterdag in die kwarteindronde teen Hoerskool Nelspruit in Nelspruit opgesit. Die ander kwarteindstryd in Nelspruit sal tussen HTS Middelburg en Monument beslis word.

In Boksburg was EG Jansen se losskakel, Ruben Beytell, die verskil tussen sy span en Garsfontein in hul deurslaggewende wedstryd in die kompetisie. Beytell het 'n driekuns aan drieë behaal en ook drie van sy span se driee verdoel asook 'n strafdoel oorgeklits vir 'n bydrae van 24 punte. Buiten die feit dat hy 'n driekuns behaal het, het hy ook sy agterlyn seepglad weggestuur.

Beytell moes eintlik in Wellington aan SA Rugby se SA Skole-oefenkamp deelgeneem het, maar het besluit dat sy skool se wedstryd dalk voorrang die naweek moet geniet. Die einste twee spanne het mekaar verlede jaar in die Virseker Beeldtrofee vir Makro-skole die eindstryd aangese.

Die Jansies se agtsteman, Carson Koekemoer, het Garsfontein ook heelwat probleme besorg. Vir Garsfontein kan sy flank Ruben Roodt vandag met sy kop omhoog rondloop.  

Menlopark het gesorg dat hy as die voorste span van Groep A tot die kwarteindronde deurdring. Die span moes wel sweet om Kemptonpark met 17-11 die loef af te steek.  

Daar sal 'n Jakaranda-derby en 'n Oos Rand-derby in die kwarteindronde op Garsfontein se hoofveld wees. Menlopark sal in die kwarteindronde op Garsfontein se veld teen die gasheer sake uitspook. In die ander kwarteindstryd op Berepark sal EG Jansen teen Kemptonpark sake uitspook. 

Puntemakers: 

Eldoraigne 27 (19) - Drieë: Riaan Burger (2), Shayne Bolton, Marcel Venter. Doelskoppe: Burger (2). Strafdoel: Bolton. Monument 22 (7) - Drieë: Franco Schutte, Tristan Dullisear, Jano Lourens. Doelskoppe: Jonathan Viljoen (2). Strafdoel: Viljoen.  

EG Jansen 34 (12) - Drieë: Ruben Beytell (3), Carson Koekemoer, Franco van Eeden. Doelskoppe: Beytell (3). Strafdoel: Beytell. Garsfontein 28 (13) - Drieë: Keagan Johannes, Juandre Scheepers, JJ van Zyl, Jayden Visagie. Doelskop: Barry Schoombee. Strafdoele: Schoombee (2). 

Nelspruit 29 (19) - Drieë: Stephan van der Bank, Tiaan du Plessis, Janro van der Berg, Chris van der Merwe. Doelskoppe: Van der Bank (3). Strafdoel: Van der Bank. Florida 22 (15) - Drieë: Swanepoel (2), R Oosthuizen. Strafdoele: Swanepoel (2).

Menlopark 17 - Drieë: Werner Nel, Barnard Adendorf, Strafdrie. Kemptonpark 11 - Drie: Cobus Hattingh. Strafdoele: Mikhail Blake (2).  

HTS Middelburg 59 (35) - Drieë: Uys du Preez (2), Henco van Heerden (2), Joubert Willers, JP Cilliers, Ruvaan Muller, Martin Erasmus. Doelskoppe: Morne Sonnekus (7). Klerksdorp 10 (3) - Drie: Dieter van Rensburg. Doelskop: Mikhael Venter. Strafdoel: Venter. 

Ander spanne: 

o.16: Menlopark 48, Kemptonpark 5; Florida 38, Nelspruit 7; Klerksdorp 57, HTS Middelburg 19; Monument 58, Eldoraigne 3; EG Jansen 34, Garsfontein 23.

o.15: Menlopark 50, Kemptonpark 5; Nelspruit 15, Florida 10; HTS Middelburg 15, Klerksdorp 12; Monument 26, Eldoraigne 24; EG Jansen 26, Garsfontein 18.

o.14: Menlopark 68, Kemptonpark 0; Florida 24, Nelspruit 13; HTS Middelburg 34, Klerksdorp 0; EG Jansen 29, Garsfontein 17; Monument 55, Eldoraigne 0.

You have no rights to post comments